青心直說：欲語無言話中話

[size=5]「我有好多嘢想講，不過淨係可以講畀自己知」，是欲語無言、語重心長還是語帶雙關，請各自解讀。
忽然聯想起兩日前，與另一位唔方便開名嘅城中較低調本地地產發展商飯敍嘅一席話，話說今日嘅特首，喺十幾廿年前與一眾本地地產發展商開會，會議雖然冗長，與會者當年仍十分樂意發表意見，務求集思廣益，只可惜原來開會到凌晨，當年可能連自己都未諗過有朝一日會成為特首嘅曾先生，行為與性格已非常鮮明及貫徹始終，當所有與會者完成提出個人意見後，佢竟然可以即時亮出一份早已預備好嘅新聞稿，與會者都係城中數一數二數三數四嘅富豪級人馬，即時反應係甚為冇癮。雖未至於嚴重到「未登特首位，已置殺人刀」，但明顯屬於意見接受，態度依舊一族，完全係有知會，冇諮詢嗰款。


放榜至追恨太遲
因此，思前想後，當大家明白今日嘅曾財爺，只係由曾特首唔知係咪因為見同姓三分親而請返嚟，總之有咩𠵱郁，就推呢塊「立體佈景板」出嚟頂住先可也。尤其財爺呢位現代葉問係習武之人，本身就散發出一股正氣，講真佢可能只係一隻可憐嘅代罪小羔羊，人人派 6000蚊，有合理懷疑好大機會其實唔係佢本人嘅主意。
言歸正傳，聽其言、觀其行，不同界別人士一舉手一投足皆有其特殊意義。好多朋友仲問緊，到底買唔買得 13號？老實講，真係唔敢答，見有輪商日日為隻瀕臨死亡嘅百分百街貨末日和黃認購輪沽現貨沽得如此狠，睇落都有啲心寒，再一次證明妹仔大過主人婆。
超人連番增持自己公司股票一啲都唔出奇，霍大班寧寧舍舍於去年 8月以平均價每股 56.751元及 59.35元，分別增持 100萬及 20萬股和記黃埔（ 013）股份，當中理由路人皆知，唔需要畫公仔畫出腸。都明知好具啟示指標作用，一早唔跟，𠵱家真係得個恨字。

胡孟青
[/size]